Yevropa Ittifoqi iste’molchilari Google’dan GDPR qoidalarini buzganlik uchun javobgarlikni talab qilmoqda

Yevropa iste’molchilar huquqlarini himoya qilish guruhlari Google’dan foydalanuvchilarning harakatlarini kuzatish uchun javobgarlikni talab qilmoqda.

Yevropa Ittifoqining bir nechta mamlakatlaridagi iste’molchilar huquqlarini himoya qilish guruhlari Google’dan millionlab foydalanuvchilarning harakatlarini kuzatish va Yevropaning yangi ma’lumotlarni himoya qilish qonunlarini buzgani uchun javobgarlikka tortilishini talab qilishdi. Reuters agentligining xabar berishicha, Niderlandiya, Polsha, Chexiya, Gretsiya, Sloveniya, Norvegiya va Shvetsiyadagi iste’molchilar huquqlarini himoya qilish guruhlari mahalliy ma’lumotlarni tartibga soluvchi organlarga shikoyat qilishgan.

Yevropa Iste’molchilar Kengashi (BEUC) Google’ni mobil qurilma foydalanuvchilarini Joylashuv tarixi va Veb va Ilovalar Faoliyati funksiyalarini yoqishga majburlash uchun turli usullardan foydalanganlikda aybladi.

Yevropa iste’molchilar jamiyatlari nomidan so’zga chiqqan BEUC, «bunday adolatsiz amaliyotlar iste’molchilarni shaxsiy ma’lumotlaridan qanday foydalanilayotgani haqida xabarsiz qoldiradi», dedi.

“Bu amaliyot Umumiy maʼlumotlarni himoya qilish toʻgʻrisidagi Nizomga (GDPR) mos kelmaydi, chunki Google soʻralgan maʼlumotlarni qayta ishlash uchun qonuniy asosga ega emas. Xususan, hisobotlarda koʻrsatilganidek, ushbu shartlar boʻyicha olingan rozilik foydalanuvchilar tomonidan ixtiyoriy ravishda berilmagan”, deb taʼkidladi BEUC.

Google tushuntirganidek, Joylashuv tarixi qurilmalarda sukut bo’yicha o’chirib qo’yilgan va foydalanuvchilar uni istalgan vaqtda yoqishlari yoki o’chirib qo’yishlari mumkin. «Uni yoqish tirbandlik haqida ogohlantirishlar kabi xizmatlarning ishlashiga yordam beradi», deb ta’kidladi kompaniya.