Yuz minglab Windows XP foydalanuvchilari tez orada Steam’ni ishga tushira olmaydigan bo‘ladilar.

Valve 2019-yilning yanvar oyidan boshlab eskirgan operatsion tizimlar uchun qo‘llab-quvvatlashni to‘xtatadi.

Valve Windows XP va Vista foydalanuvchilariga o‘z operatsion tizimlarini yangilash uchun olti oy vaqt berdi. Aks holda, 2019-yilning yanvar oyidan boshlab ular Steam xizmatidan foydalana olmay qoladilar. «Steam rasman Windows XP va Windows Vista operatsion tizimlarini qo‘llab-quvvatlashni to‘xtatadi. 2018-yil 19-yanvardan so‘ng Steam mijozi (dasturi) Windows-ning ushbu versiyalari o‘rnatilgan qurilmalarda ishlamay qoladi. Steam hamda u orqali xarid qilingan o‘yinlar yoki mahsulotlardan foydalanishni davom ettirish uchun foydalanuvchilar Windows-ning yangiroq versiyasiga o‘tishlari kerak bo‘ladi», — deya ma’lum qildi kompaniya.

Windows XP foydalanuvchilari Steam foydalanuvchilarining umumiy sonida juda kichik ulushni — bor-yo‘g‘i 0,22 foizni tashkil etadi. Steam’dan taxminan 125 million kishi foydalanishini hisobga olsak, 0,22 foiz taxminan 275 000 nafar foydalanuvchiga to‘g‘ri keladi.

Valve vakillarining so‘zlariga ko‘ra, ishlab chiquvchilar Steam’ga qo‘shishni rejalashtirayotgan yangi funksiyalar qatorida Chrome’ning o‘rnatilgan (embedded) versiyasidan foydalanadigan Discord uslubidagi chat tizimi ham bor; biroq Windows’ning eski versiyalari ushbu texnologiyani qo‘llab-quvvatlamaydi.

«Bundan tashqari, Steam’ning kelgusi versiyalari faqat Windows 7 va undan keyingi tizimlarda mavjud bo‘lgan funksionallikni talab qiladi», — deb qayd etdi Valve.