AQSh Kiber qo’mondonligi Rossiya tomonidan tahdidga qarshi kurashish uchun ishchi guruh tuzdi.

Ishchi guruh AQSh hukumati ko’rsatmalariga muvofiq tashkil etilgan.

Milliy xavfsizlik agentligi (NSA) rahbari general-leytenant Pol Nakasone Kolorado shtatining Aspen shahrida bo’lib o’tgan xavfsizlik forumida Rossiya kibertahdidiga qarshi kurashish uchun ishchi guruh tuzilganini e’lon qildi. Bu haqda TASS axborot agentligi xabar berdi. Agentlik rahbarining so’zlariga ko’ra, ishchi guruh AQSh hukumati ko’rsatmalariga muvofiq tuzilgan. Ushbu tuzilmaning aniq mohiyati hozircha noma’lum.

“Men rus guruhini, kichik rus guruhini tuzdim. Bu razvedka hamjamiyati 2016-yildan beri qilayotgan ishlariga muvofiq amalga oshirildi. Bu, albatta, men [Ichki xavfsizlik] kotibi va maʼmuriyatdan olgan talablar va koʻrsatmalarga, shuningdek, men ushbu murakkab masalalarga qanday qarayman, degan savolga mos keladi”, deb taʼkidladi u.

Eslatib o’tamiz, AQSh rasmiylari ilgari Rossiya Qurolli Kuchlari Bosh razvedka boshqarmasining 12 nafar gumonlanuvchisiga qarshi sirtdan ayblov e’lon qilgan edi. Ushbu ayblovlar 2016-yilgi prezidentlik saylovlari arafasida sodir bo’lgan AQSh Demokratik partiyasi serverlariga xakerlik hujumi bo’yicha tergov doirasida qo’zg’atilgan.