AQSh to’qqiz nafar eronlikni dunyo bo’ylab universitetlarga xakerlik hujumida aybladi.

AQSh to’qqiz nafar eronlikni dunyo bo’ylab universitetlarga xakerlik hujumida aybladi.

Guruh 22 mamlakatdagi 320 dan ortiq universitetlar tarmog’iga kirib, 30 terabaytdan ortiq akademik ma’lumotlarni o’g’irlagan deb ishoniladi.

AQSh Adliya vazirligi ilmiy hujjatlar va tadqiqot ma’lumotlarini o’g’irlash maqsadida butun dunyo bo’ylab universitetlar, texnologiya kompaniyalari va davlat tashkilotlariga xakerlik hujumlari uyushtirgan to’qqiz nafar eronlikka qarshi jinoiy ish qo’zg’atdi.

FQBning ta’kidlashicha, sudlanuvchilar 2013-yilda tashkil etilgan Eron kompaniyasi Mabna instituti bilan bog’liq bo’lib, uning a’zolari go’yoki Eron hukumati tomonidan razvedka ma’lumotlarini to’plash uchun yollangan.

O’g’irlangan hujjatlarning mazmuni hali ham noma’lum bo’lsa-da, tergovchilar ular eronlik olimlarga yadroviy qurol ishlab chiqishda yordam bergan bo’lishi mumkinligiga ishonishadi.

So’nggi to’rt yil ichida ushbu xakerlar guruhi 22 mamlakatdagi 320 dan ortiq universitetlar tarmog’iga kirib, 30 terabaytdan ortiq akademik ma’lumotlar va intellektual mulkni o’g’irlagani taxmin qilinmoqda. Hujum qilingan mamlakatlar qatoriga Yaponiya, Xitoy, Avstraliya, Kanada, Daniya, Finlyandiya, Germaniya, Irlandiya, Isroil, Italiya, Malayziya, Niderlandiya, Norvegiya, Polsha, Singapur, Janubiy Koreya, Ispaniya, Shvetsiya, Shveytsariya, Turkiya va Buyuk Britaniya kiradi.

Guruh butun dunyo bo’ylab 100 000 dan ortiq elektron pochta akkauntlari va professorlarning kompyuter tizimlarini nishonga olgan fishing kampaniyalarini o’tkazdi va 7998 ta akkauntni muvaffaqiyatli ravishda buzib kirdi.

«Ularning asosiy maqsadi professorlarning foydalanuvchi nomlari va parollarini olish, akkauntlarga ruxsatsiz kirish va ilmiy ma’lumotlarni o’g’irlash edi», dedi FQB.

Ayblov xulosasiga ko’ra, Mabna instituti o’g’irlangan ma’lumotlarni Eron Qurolli Kuchlarining elit razvedka bo’linmasi bo’lgan Islom inqilobi gvardiyalari korpusi (IRGC) bilan ham baham ko’rgan.

Bundan tashqari, guruh o’g’irlangan ma’lumotlarni turli ilmiy maqolalarga bepul kirish imkonini beruvchi Megapaper.ir va Gigapaper.ir xizmatlari orqali tarqatgan.