Rossiya Telegram’ni bloklash uchun yangi texnologiyani sinovdan o‘tkazmoqda.

Yangi tizim messenjerga kirishni doimiy ravishda bloklay oladi.

Rossiya Telegramni butunlay bloklaydigan yangi tizimni sinovdan o’tkazmoqda. Bu haqda Reuters agentligi 30-avgust, payshanba kuni o’z qo’lidagi tegishli hujjatlar nusxalariga tayanib xabar berdi. Yangi trafik tahlili va filtrlash texnologiyasini sinovdan o’tkazish 6-avgust kuni Reutov shahrida Rostelekom tarmoqlarida boshlandi. Sinovni Roskomnadzor, Rossiya Aloqa vazirligi va Federal xavfsizlik xizmati (FSB) mutaxassislaridan iborat idoralararo komissiya o’tkazmoqda.

Komissiya yig’ilishi bayonnomasida qayd etilganidek, sinov davomida Roskomnadzor va FSB Rossiyaning RDP.RU, ADM Systems, NTC Protey, DDoS-Guard, Napa Labs, Vas Experts va Rostec davlat korporatsiyasi tarkibiga kiruvchi Concern Avtomatika kompaniyalarining trafikni filtrlash tizimlarini sinovdan o’tkazishni rejalashtirgan edi.

Protey ilmiy-texnik markazi egalaridan biri Anton Pinchukning so’zlariga ko’ra, hozirda yangi trafikni filtrlash tizimi sinovdan o’tkazilmoqda. Biroq, uning kompaniyasi vazifalarning haddan tashqari ko’pligi va muddatlarning cheklanganligi sababli loyihada ishtirok etishdan bosh tortdi. Pinchukning xabar berishicha, Rostelecom tarmoqlaridan foydalangan holda sinov o’tkazish jarayonida 1 Tbit/s dan ortiq tezlikdagi kanaldagi deyarli barcha ma’lum tarmoq protokollarini aniqlash va blokirovka qilish uchun Deep Packet Inspection (DPI) texnologiyasi talab qilingan.

Mutaxassisning tushuntirishicha, Roskomnadzor Rossiya bo’ylab telekommunikatsiya operatorlari tarmoqlariga o’rnatilishi mumkin bo’lgan tahlil, filtrlash va blokirovka qilish uchun samarali yechim izlamoqda.

Eslatib o’tamiz, yaqinda Aloqa va ommaviy axborot vositalari vazirining o’rinbosari Aleksey Volin internetda hech narsani to’liq blokirovka qilishning iloji yo’qligini ta’kidladi.

Chuqur paket tekshiruvi – bu statistik ma’lumotlarni to’plash, tarmoq paketlarini ularning tarkibiga qarab tekshirish va filtrlash texnologiyasi. Xavfsizlik devorlaridan farqli o’laroq, u nafaqat paket sarlavhalarini, balki OSI model 2 va undan yuqori qatlamlarida trafikning to’liq tarkibini ham tahlil qiladi.